UNTL Iha Ona Akordu Koopersaun Internasional 325

Eduardo

#UNTL, 06 fevereiru 2019

Universidade Nacional Timor Lorosa’e (UNTL) nia Proreitór ba Asuntu Kooperasaun, Professór Doutór Eduardo Aniceto Serrão, iha nia servisu fatin, iha Kampus Sentral, Dili, hateten universidade nasional halo ona 325 akordu koorperasaun instituisional ho parseiru husi nasaun sira inklui husi Ásia, Oceánia, Europa, Amérika, no Áfrika.

“Tuir planu polítika UNTL nian, ita presiza involvimentu no divulgasaun permanente programa internasionál iha edukasaun, formasaun no peskiza,” hateten Proreitór Dr. Serrão.

Proreitór haktuir tan katak akordu kooperasaun refere nia benefísiu maka iha ona bolseiru atus-rua-hitu (207) timor-oan nain sanolu-resin-neen (16) iha nasaun ne’ebé diferente, no iha ona estudante atus-ida-rua-nolu-resin-neen (126) UNTL nian hetan bolsa estudu husi doadór Internasionál sira.

Liuhusi kooperasaun internasionál bele mós kria rede kooperasaun akadémika inklui partisipasaun iha AULP (Associação das Universidades de Língua Portuguesa), FORGES (Fórum da Gestão do Ensino Superior nos Países e Regiões de Língua Portuguesa), RIPES (Rede de Instituições Públicas de Educação Superior) no Trilateral (Australia, Indonesia no Timor-Leste).

Tuir Proreitór katak projetu prinsipál sira kooperasaun UNTL nian oras ne’e maka Programa Erasmus Mundus, Programa Intra-ACP, Osaka Gas Foundation for International Cultural Exchange, no programas seluk ho Camões I.P., University of Nordland, no ho Fundasaun Alola.

Média UNTL/ Estajiariu, Luis de Almeida Ximenes
Foto: Miguel Gonçalves