UPDC divulga produsaun sientífika sira

Estudante

#UNTL 04 fevereiru 2019

Universidade Nasional UNTL ninia Unidade Produsaun i Diseminasaun Koñesimentu (UPDC), hanesan sub-unidade ne’ebé tutela ba iha Programa Pós-Graduasaun i Peskiza (PPGP), atu divulga produsaun sientífika sira, no kopera ho unidade no departamentu sira seluk ne’ebé eziste iha universidade Nasionál UNTL hodi publika rezultadu peskiza profesór sira-nian.

UPDC akomoda mós investigadór dotourandu internasionál nain lima (5) husi Brazil, Portugál no Inglatera ne’ebé hala’o sira-nia peskiza iha unidade ne’e nia laran.

“Durante ezisténsia unidade ne’e iha unversidade hala’o ona atividade oin-oin, realizasaun konferénsia, kolókiu no semináriu sientífiku sira, inklui publika ona Revista Veritas,” hateten Xefe Unidade, Profesór Doutór Vicente Paulino.

Revista Veritas, maka publikasaun ho tipu livru ne’ebé akumula artigu sientífiku sira ne’ebé peskizadór UNTL sira hala’o no publika liu hosi UPDC.

Dadaun ne’e Revista Veritas iha ona volume 20 no hahu publika dezde tinan 2014. Revista Veritas mós disponível ba asessu gratuitu no públiku liuhusi repositóriu dijitál UNTL nian liuhusi link: (http://repositorio.untl.edu.tl).

Partes interessadu atu hetan kópia revista veritas bele desloka diretamente ba UPDC nia fatin lokaliza iha resintu kampus Ekonomia i Jestaun, iha UNTL, Dili.

Média UNTL / Estajiária: Emerenciana de Jesus
Foto: Moises do Rego