#UNTL, 23 janeiru 2019
Universidade Nasional UNTL, liuhusi Diresaun Nasional ba Atendimentu Estudante (DNAE), hahú distribui alma mater ba estudante sira seidauk simu, liuliu periodu tinan letivu 2017 nian.
Tuir Diretór DNAE, Rui Loco Pires, hateten alma mater UNTL distribui kada fakuldade nian hahú iha dia 23 janeiru to'o dia 6 de fevereiru 2019.
“Iha tinan 2018 liubá ami-nia planu atu fahe kazaku alma mater ba estudante sira ne’ebé tama iha 2017 maibé liuhusi enkontru Senadu nian deside fahe uluk tinan letivu 2018 atu estudante sira uza ba oriéntasaun akadémiku”, nia hateten.
Diretor haktuir tan katak alma mater nu’udar identidade ba estudante sira-nian iha Universidade Nacional Timor Lorosa’e tanba ne’e DNAE sei fahe unidade 3500 ba sira ne’ebé seidauk simu tanba sira iha direitu atu asesu ba alma-mater.
Kritéria atu simu kazaku alma mater maka kada estudante sei hatudu resibu orijinál ne’ebé vistu katak selu ona.
Média UNTL / Estajiáriu: Elias & Leonia
Foto: Miguel Gonçalves