UNTL LIUHUSI FMSS AGRADESE APOIU OMS NIAN BA FORMASAUN KUADRU MÉDIKU

Universidade Nacional Timor Lorosa’e (UNTL), liuhusi Fakuldade Medisina Siénsia Saúde (FMSS), Departamentu Medisina Jerál, iha Sala Vídeo-Konferésia-Reitoria (18-04) hato’o agradesimentu formál ba Organizasaun Saúde Munidiál tanba apoiu unidade oioin (materiál ezekutivu i informátika) liuhusi Brigada Médica Cubana hodi kompleta rekursu prátika nian.

UNTL OMSIha entrevista Reitór UNTL nian, Francisco Miguel Martins hateten medisina labele teoria de’it maibé mós prátika, nune’e unidade hirak ne’ebé apoia husi OMS (WHO) ne’e, tantu laboratóriu, livru no unidade sira seluk bele ajuda estudante sira eleva sira-nia kualidade.

“Futuru dezenvolvimentu sustentável Timor-Leste nian ita investe, OMS mós hakarak investe,  universidade orgullu tanba ita-nia Orsamentu Estadu rasik seidauk bele sosa ekipamentu hirak, ita simu ho responsabilidade hodi hasa’e estudante sira-nia kualidade liuliu Medisina Jerál hodi serví di’ak liután timoroan sira-nia saúde”, afirma Reitór.

Namkait ho apoiu ne’e Reitór akresenta katak nafatin solisita ekipamentu sira, moderniza no evolui tanba ne’e Reitoria nia konsentrasaun atualmente tantu iha planu asaun anuál no apoiu sira foka ba laboratóriu no bilioteka atu eleva kualidade iha parte hotu.

Relativamente ho apoiu ne’e, Dekanu Fakuldade Medisina I Siénsia Saúde, João Martins hateten eventu ne’e agradesimentu ida ba OMS tanba apoia fakuldade durante tinan barak nia laran hodi tulun materiál ensinu, livru, kadeira, AC, komputadór no ekipamentu relevante balun.

“Materiál hirak ne’e ajuda tebes fakuldade liuliu professór sira iha prosesu ensinu-aprendizajen. Tanba ne’e ha’u haree OMS nia reprezentante sente kontente katak apoiu ne’e universidade uza duni, ne’e prosesu pozitivu ida”, tenik Dekanu.

Maské apoiu ne’e sentraliza iha Departamentu Medisina Jerál maibé departamentu hirak iha Fakuldade bele asesu bainhira presiza, nune’e, Dekanu husu mós ba estudante sira atu asesu ho di’ak rekursu sira ne’e hodi mellora prosesu aprendizajen duké lee de’it livru.

Enkuantu Vise-Ministru Saúde, Luis Maria Lobato, iha diskursu katak eventu ne’e importante atu sai testamuña ba doasaun ida husi OMS ba FMSS tanba presiza kondisaun di’ak atu alkansa kualidade formasaun hodi mellora asisténsia saúde iha Timor-Leste.

“Ha’u mai iha ne’e reprezenta señor Ministru hodi agradese ba OMS, FMSS espesialmente apoiu sira husi Cuba, País-Irmão ne’ebé ho komitmentu apoia FMSS iha Timor-Leste, ho ita-nia inisiu kooperasaun dezde 2003 , Governu Dahuluk i Saudozu Fidel Castro, assegura katak apoiu ne’e signifikante ba fakuldade”, Rekorda Luis Lobato.

Iha fatin hanesan Xefe Reprezentante OMS nian iha Timor-Leste, Rajesh Pandav kontente hodi partesipa iha eventu ne’e, no ho esperansa katak ekipamentu hirak ne’e bele ajuda universidade hodi hasa’e kualidade médiku sira nian iha Timor-Leste.

Apoiu ne’e kompostu husi unidade médiku nian 36, testu imprezu no dijitál 314, unidade mobiliáriu sira 287, unidade ba apoiu diagnóstika médika nian 429.

Agradesimentu ne’e partesipa husi Ministru Edukasaun i Kultura, Vise-Ministru Saúde, Reprezentante OMS nian iha Timor-Leste, Embaixadór Cuba nian iha Timor-Leste, Estrutura UNTL nian, no Professór Cubanu sira. *MG434*