Universidade Koopera Hasa’e Estudante Sira-nia Kapasidade Jornalizmu

Liuhusi Memorandum Entendimentu ne’ebé assina husi UNTL, UNITAL ho Kosellu Imprensa (KI) I reprezentante UNESCO iha Otel El-Legendary Lesidere tersa-feira (13-3) ne’e atu fó formasaun ida ho ba estudante finalista sira iha área jornlizmu nian liuhusi kooperasaun KI ho UNESCO nia delegasaun iha Jakarta ne’ebé finansia husi Governu Reinu Olanda.BBB

Iha entrevista Reitór UNTL, Professór Francisco Miguel Martins afirma katak mundu rekoñese universidade nian papel.

“Memorandum Entendimentu ne’ebé ita asina katak ita iha Departamentu Komunikasaun Sosiál (DCS) ne’ebé hala’o hela knar ba formasaun jornalizmu nian tanba ne’e konsellu Imprensa ho parseiru sira fó importánsia ba universidade rua ne’ebé iha DCS, liuliu UNTL tanba fornese ona graduadu barak maka uza ona husi média sira”

Fonte ne’e hato’o katak ho formasaun ne’e akademikamente eleva estudante sira-nia kapasidade hodi oferta informasaun ne’ebé adekuadu.

“Ha’u nia esperansa katak liuhusi kooperasaun ne’e bele hetan tan tulun husi Governu Olanda ho UNIESCO, tanba ne’e institusionalmente ita koopera hodi eleva ita-nia futuru jerasaun sira ba área jornalizmu nian”.

Enkuantu Diretora Departamentu Komunikasaun Sosiál UNTL, Dominika Dwikori Sitaresmi hateten formasaun ne’e ho nivel fundamentu ba estudante finalista sira atu aprende.

“Oportunidade ne’e di’ak tebes ba estudante sira, ha’u husu ba estudante sira atu uza aproveita tempu ne’e atu partesipa no estuda”.

Iha Ajénsia Notisioza Timor-Leste, Prezidente Konsellu Imprensa, Virgilio da Silva Guterres hateten Universidade Nacional Timor Lorosa’e (UNTL) ho Universidade Oriental Timor Lorosa’e (UNITAL) sai tarjetu ba projetu mekanizmu auto-regulasaun komunikasaun social iha Timor-Leste.

“Projetu ne’e ami envolve universidade rua tanba ita-nia rain únika universidade rua maka iha departamentu komunikasaun sosiál, nune’e sira sai tarjetu hodi sa’e sira-nia koñesimentu”.

Nota-entendimentu ne’e asina iha ne’ebé Konsellu Imprensa hamutuk ho parseiru sira lansa programa “Mekanizmu Hametin Autoregulasaun Média iha Timor-Leste 2018 ”

Formasaun jornalizmu ne’e, iha UNTL ba estudante semestre VII sira ne’ebé Departamentu Komunikasaun Sosiál UNTL nian, prepara ona atu ba estájiu hamutuk nain 60. Iha ne’ebé formadór internasionál nain tolu mai husi UNESCO ida ba UNITAL no nain rua ba UNTL. *MG434*