KUALIDADE EDUKASAUN ATINJI LIUHUSI PROSESU KONTÍNUA

Universidade Nasional Timor Lorosa’e (UNTL), liuhusi fakuldade Medisina I Siénsia Saúde, realiza serimónia Judisium no juramentu Profissionál ba resen-jurradu sira hamutuk 119 ho tema “Juramentu professionál Nu’udar baze ba profisaun hodi kontribui ba melloramentu asisténsia saúde”.

Iha Palásiu-Nobre Lahane, sesta-feira ne’e (02-02), liuhusi diskursu, Magnífiku Reitór UNTL, Francisco Miguel Martins hateten kualidade edukasaun atinji liuhusi prosesu kontínua, nune’e mós susesu alkansa liuhusi esforsu.

FB 1“Povu no estadu nia orgullu, ita haki’ak no prodús futuru estafeta ba dezenvolvimentu nasionál sutentável, ita UNTL iha dezevolvimentu ba setór edukasaun sempre kontínua tanba ne’e ita investe iha kualidade liuhusi hasa’e kapasidade dosente no mellora fasilidade biblioteka no laboratórium”,

 

Ezekutivu ne’e afirma liután katak responsabilidade inan-aman-nian boot ba futuru oan sira-nian iha nasaun ida ne’e nian, liuhusi inan-aman idaidak kontribui iha prosesu dezenvolvimentu.

Iha fatin hanesan Dekanu FMSS, João Martins hateten Timor-Leste foin dahuluk UNTL liuhusi FMSS prodús lisensiadu iha parteira no farmásia i ba inan-aman no professor sira maibé ba oin sei barak liután.

FB 2“Ho ida ne’e presiza ita hotu nia esforsu, servisu fó liman ba malu hodi alkansa prosesu dezenvolvimentu I agradese ba UNTL ne’ebé fó mahon ba Fakuldade nomós entidade hotu ne’ebé kontribui ho apoiu sira”.

Entretantu Reprezentante estudante, Sergio Guterres husu ba inan-aman sira atu fó tempu ba oan sira hodi buka matenek, no dosente sira nafatin sai nafatin nakonu ho vontadu neon badina hodi fahe siénsia ba estudante sira.

Iha eventu ne’e, resen-juradus sira husi departamentu parteira nain 58 no departamentu Farmásia hamutuk nain 61 ho total 119. Husi númeru ne’e maka preparadu ona hodi simu graduasaun husi UNTL iha fulan maiu tinan ne’e.

Marka mós prezenta reprezentantu relijioza, reprezentante husi Ministériu Saúde, inan-aman sira. Estrutura Universidade, Fakuldade no konvidadu sira. *MG434*